Algemene voorwaarden

Condicionnan general ta stipulacionnan of clausulanan por escrito formula pa ta parti di un acuerdo of contrato cu excepcion di stipulacionnan cu ta indica e esencia di rendimiento, manera por ehempel prijs. Un negoshi no mag stipula condicionnan general pa loco. Ley a pone reglanan pa stipulacion di condicionnan general y cu ta indica kico por y kico no mag aparece den e condicionnan general. Nos codigo civil buki 6 ta trata e ley di condicionnan general den e articulonan 231 te cu 247. E caracter di e ley aki ta obligatorio o sea cu partidonan no por desvia di nan.

Condicionnan general entre otro mester ta formula di un manera pa wordo usa den mas cu un acuerdo y mester keda dentro di un termino husto pa e consumido. Si acaso e comerciante no cumpli cu e ley di condicionnan general, Hues por dicta cu e condicionnan general ta invalido.

E ley di condicionnan general ta papia di usuario (comerciante) y contrapartido (consumido). E usuario (comerciante) den mayoria caso ta e negoshi cu ta stipula e clausulanan como parti di un contrato. E contrapartido (consumido) ta e esun cu lo mester acepta e condicionnan general cu ta aplicabel pa e acuerdo sea por escrito of di otro forma y hopi bes esaki ta e consumido. Un consumido ta un persona natural cu no ta funciona den ehecucion di un profesion of empresa.

Ley ta pone dos exigencia basico na condicionnan general:

• Condicionnan general no mag di ta inhusto;
• E contrapartido (consumido) mester por lesa e condicionnan general prome cu e haci un decision definitivo. Esaki yama e deber pa informa, pues e negoshi tin obligacion pa informa e contrapartido (consumido) di e reglanan.

Ley di condicionnan general tin un lista di prohibicionnan. E prohibicionnan aki ta reparti den un lista preto y un lista shinishi. E lista preto ta un lista di condicionnan cu ta prohibi, o sea cu no mag aparece mes den e condicionnan general mes. E lista shinishi ta un lista di condicionnan cu ta riba e frontera di inhusto. E usuario (comerciante) tin di prueba cu e uso di e condicionnan riba e lista shinishi den su situacion especifico no ta inhusto. Ta keda na Hues pa dicidi si e condicionnan aki por keda como parti di e contrato.

 E ley di condicionnan general ta bisa cu e contrapartido (consumido) ta mara na e condicionnan general hopi lihe, pero di otro banda ta duna e contrapartido (consumido) espacio tambe pa anula e condicionnan general. Pues, e contrapartido (consumido) tin e posibilidad pa anula stipulacionnan di e condicionnan general ora cu e usuario (comerciante) no a cumpli cu por ehempel su deber pa informa of ora cu un stipulacion ta excesivamente inhusto.