Keho y desacuerdo

  • Print

Dienst Huur- en Consumentenzaken ta asisti e consumido cu informacion, conseho y tambe cu intermediacion ora tin disputa. Tanto riba asunto di huur como riba asunto di consumido por presenta un keho of desacuerdo. Un keho ta un expresion di un malcontento y esaki por sosode facilmente. Ley ta duna guia con pa actua na momento cu tin un keho of desacuerdo.

Dienst Huur- en Consumentenzaken tey pa yuda bo cu bo desacuerdo riba asunto di huur of asunto di consumido. Bo por cuminsa via e website aki manda pa bo caso y mas pronto posibel un funcionario lo tuma contact bo pa duna bo asistencia.

Huur

Bo ta huur un cas y bo a hayabo den un pleito cu e doño di cas? Of viceversa, bo a hayabo den problema cu un inkilino. Diferencia di opinion por pasa, pero esaki no mag escala te un punto incontrolabel. Sea bo ta inkilino of doño di cas, Dienst Huur- en Consumentenzaken tey pa yubao cu e problema aki. Click aki y conta nos kico a pasa. Si ainda bo no kier bay asina leu pa pidi asistencia, riba nos website nos tin un lista di pregunta frecuente cu por yudabo riba bo asunto di huur.   

Consumido

Un disputa ta un desacuerdo entre e consumido cu un negoshi. Si e consumido keda insatisfecho cu e respuesta di e negoshi e por entrega un keho cerca Dienst Huur- en Consumentenzaken pa intermediacion of pa registra e keho. Den caso di intermediacion nos lo trata pa hunto sali di e desacuerdo. Pa locual ta trata atendimento di keho di consumido Aruba conoce Fundacion CAS y Dienst Huur- en Consumentenzaken (DHC). Fundacion CAS (Consumidornan Arubano Solidario) ta un fundacion cu ta existi desde 1990 y cu ta ricibi subsidio di Gobierno. CAS su obhetivo ta pa defende y promove interesnan di e consumidor den sentido mas amplio di palabra. Dienst Huur- en Consumentenzaken como departamento di Gobierno tambe ta duna asistencia cu keho di consumido.

Cierto keho cu e consumido entrega na Dienst Huur- en Consumentenzaken ta funda, pero otro kehonan no ta funda. E ta pasa tin biaha cu e negoshi ta ignora ley di proteccion di e consumido. Ta pasa tambe cu tanto e negoshi como e consumido ta culpabel y e kehonan aki por trece confusion. E sa pasa tambe cu pa falta di informacion e consumido ta rabia sin tin rason. Tin biaha e negoshi ta duna servicio mediocre cu por causa frustracion cerca e consumido, pero esaki no kiermeen cu e negoshi a comete un infraccion di e derecho di consumido.

Bo ta un consumido y bo ta sinti cu un negoshi no a respeta bo derecho? Si bo tin un keho di consumido, click aki pa nos duna bo asistencia.