Kico ta huurcommissie

Huurcommissie ta un comision independiente institui pa Gobierno desde 1939 y cu ta encarga cu implementacion di ordenansa cu ta reglamenta asunto di huur. Por medio di Huurcommissie, Gobierno ta trata di regula un gran parti e condicionnan bao cual e huurmento ta tuma lugar. E condicionnan di un acuerdo di huur ta inclui e prijs di huur, termino di huur, terminacion di huur, estado estado fisico di e propiedad, etc.

Hopi hende conoce Dienst Huur- en Consumentenzaken como huurcommissie, pero esaki en realidad no ta correcto door cu huurcommissie ta un organo separa e independiente. Dienst Huur- en Consumentenaken ta duna asistencia administrativo na huurcommissie pa yuda e inkilino den su derecho como tambe e ta yuda organisa e relacion entre partidonan.

Huurcommissie ta consisti di un presidente y un representante di e interes di inkilino y un representante di e interes di doño di propiedad. Akibao tin un grafico cu ta mustra esaki:

Un di e tareanan di huurcommissie ta pa resolve disputa of haci declaracionnan entre doño di cas y inkilino riba por ehempel prijs di huur, y si ta necesario stipula prijs di huur rasonabel. Si e doño di cas y e inkilino tin un disputa (diferencia di opinion of discusion) riba por ehempel prijs di huur of terminacion di huur nan mester presenta esaki na huurcommissie. Huurcommissie na e momento ey ta tende ambos partido y a base di hecho y tambe splicacion di ambos partido ta haci su declaracion final riba e caso.

Huur y huurdo

No obstante cu Aruba conoce un economia di mercado liber, toch Gobierno ta regula e mecanismo riba diferente tereno manera riba tereno di huur. Por medio di Huurcommissie Gobierno ta trata di regula pa un gran parti e condicionnan (prijs di huur, contrato di huur, estado fisico di e cas/ appartment) bao cual e huurmento ta tuma lugar.

Un di e tareanan di Dienst Huur- en Consumentenzaken ta pa duna sosten administrativo na Huurcommissie. Den cuadro di e tarea aki Dienst Huur- en Consumentenzaken ta atende publico cu informacion general relaciona cu huur, intermediacion na momento den caso di un conflicto fuerte entre e inkilino y doño di cas y tambe asistencia pa e peticionnan cu Huurcommissie ta trata manera peticion pa terminacion di acuerdo di huur, calculacion di prijs di huur y aumento di prijs di huur. 

Huurcommissie ta un comision independiente institui pa Gobierno cu ta encarga cu implementacion di ordenansa cu ta reglamenta asunto di huur. Pa servicionan di terminacion di huur, configuracion di prijs y permiso pa aumento di prijs di huur mester pasa via huurcommissie, y mester trece un identificacion valido y informacion relevante pa e caso esta nomber, fam y adres di tanto e inkilino como e doño di cas.

Huur un cas, apartamento of cualkier otro propiedad inmobil ta encera cera un contract entre dos partido, esta e huurdo (inkilino) cu e doño di cas. E contract aki tin su propio condicionnan, pero contract di huur ta mara na ley tambe. Hopi biaha e contract di huur ta inclui condicionnan pa e huurdo so, pero esaki no ta kita cu pa ley e doño di cas tin cu cumpli cu cierto debernan.

E huurdo mester ta consciente di e huur cu e por paga. Si acaso e entrada di e huurdo desminui, e huurdo mester cuminsa prepara su mes pa tuma decisionnan importante manera esun di busca un otro vivienda pa biba. Pues, mientras e huurdo ta biba den e vivienda e ta mara na cumpli cu su debernan como bon huurdo entre otro e deber di paga e huur. Si acaso e huurdo no por cumpli mas cu su deber di paga huur, e debe di huur lo keda aumenta desproporcionalmente. E aumento di debe aki solamente por crea mas peso riba e situacion financiero di e huurdo. Pesey Dienst Huur- en Consumentenzaken ta conseha e huurdo pa semper cumpli cu su deber di huur.

Preguntanan Frecuente Huur

Ora cu e inkilino cu e doño di cas hunto no ta di acuerdo, nan ta acudi cerca Dienst Huur- en Consumentenzaken pa informacion, intermediacion cu problema di huur of pa un servicio di huurcommissie. Akibao tin algun di e preguntanan mas frecuente riba asunto di huur: 

• Kico ta pasa cu e inkilino ora cu e doña bende e cas?
• Con ley ta regla awa cu coriente den huur?
• Con ley ta regla borg?
• E doño di propiedad mag hisa e prijs di huur?
• Kico ta debernan di un bon doño di cas?
• Kico ta debernan di un bon inkilino?

Kico ta pasa ora cu e doño di cas bende e cas?

Ora un cas ser bendi esey no ta significa cu e inkilino mester sali. Den codigo civil di Aruba ta para bon cla cu “koop breekt geen huur”, cual ta significa cu benta no ta kibra e relacion di huur. Excepcion di esaki por ta findishi cu por inclui permiso di Hues pa termina huur. Pa kibra e relacion di huur, e doño nobo mester pasa Dienst Huur- en Consumentenzaken pa laga yena un formulario cu yama Verzoek tot Huuropzegging. E motibo lo ta e ora cu e doño nobo lo kier su cas pa uso propio/ renobacion.

Con ley ta regla awa cu coriente den huur?

Huurcommissie no ta trata asunto di awa ni di coriente, pero Dienst Huur- en Consumentenzaken por intermedia den caso cu e inkilino no ta di acuerdo cu e doño di cas riba e topico aki. Semper ta bon pa ora di huur un apartamento of cas conectele riba su propio meter di awa y/of coriente apart riba nomber di e inkilino. Si acaso e doño di cas ponele riba su nomber anto e inkilino no paga e cuenta e ora e doño di cas ta core e riesgo cu tur gasto por corre pa e doño di cas. Si no ta posibel pa instala un meter apart pa evita discusion mester instala na cada apartamento un tussenmeter. E ora e doño sa exactamente ta cuanto cada inkilino a gasta na awa y coriente. Pa mas informacion yama Web y Elmar.

Awa y coriente ta derecho basico di cada ser humano. Maske cu e inkilino no paga e cuenta di awa of coriente, e doño di cas no mag di kita su awa of coriente. E doño di cas mester duna e inkilino suficiente plaso pa reaciona. Hopi doño di cas pa proteccion propio ta pone un clausula den e contract di huur cu asina cu e inkilino no paga ta kita e awa y coriente. Sin embargo  finalmente ta keda na Hues pa dicidi si esaki ta husto. Loke si por haci ta tambe manda un carta registra (aangetekend) bisando e inkilino pa pone e meter di awa y coriente ariba su nomber. Dunele dos siman p’e haci esey y despues bo mag cera e meternan.

Loke Dienst Huur- en Consumentenzaken ta haci den un caso asina ta purba di yega na un areglo cu e partidonan y tambe mustra e doño cu e acto di desconecta no por door cu ta atacha e prome necesidad di un ser humano. Si e doño di cas hacie toch, e acto aki ta debilita su caso  dilanti Hues.

Con ley ta regla borg?

Borg en realidad no ta regla den ley di huur y por forma un riesgo pa tanto e doño di cas como pa e inkilino. Pa e inkilino cu paga borg e riesgo ta existi cu aunke e no a ocasiona ningun daño na e priopiedad toch e doño di cas na final di contrato di huur keda sin debolbe e borg. Pa e doño di cas e riesgo di no cobra borg ta cu si acaso e inkilino ocasiona hopi daño na su priopiedad e por keda cu hopi gasto di reparacion. P’esey Dienst Huur- en Consumentenzaken ta conseha pa si acaso e doño di cas ta cobra borg, pone e reglanan di borg cla riba papel y pone condicionnan na e borg cu ta husto y rasonabel pa tanto e doño di cas como e inkilino.

E doño di cas mag di hisa e prijs di huur? 

Den principio e doño di cas no mag hisa e prijs di huur sin pidi aprobacion di Huurcommissie. Si acaso e balor historico di e propiedad ta mas cu 100.000 florin Huurcommissie lo dicidi cu e doño di cas ta liber pa stipula cualkier prijs di huur. Si acaso e huurdo ta mara na un contract y e contract caba, na inicio di e proximo contract e doño di cas en principio mag pone un prijs nobo pa e propiedad. Si den e caso aki e huurdo no ta di acuerdo cu e prijs nobo, semper e por keda sin firma e contract nobo cu tur consecuencia di esaki of e por pidi huurcommissie pa evalua si e prijs nobo ta conforme ley di huurcommissie.

Kico ta e debernan di un bon Doño di Cas?

• duna e inkilino un cas den bon estado sin dañonan scondi (verborgen gebreken);
• duna e inkilino paz (huur- en woongenot);
• duna e inkilino un contract di huur pa firma cu ta den balans pa ambos partido;
• traha cu e inkilino un lista di inventario;
• traha cu e inkilino un lista di yabi;
• prome cu e cas keda gehuurd haci na Dienst Huur- en Consumentenzaken un peticion pa laga Huurcommissie bin evalua e cas y stipula un prijs di huur maximo.

Kico ta e debernan di un bon inkilino?

• Firma e contract di huur;
• Tene e cas den bon estado y limpi;
• Laga e cas den mesun condicion cu e inkilino a hayele;
• No mag subalkila (onderverhuur) a menos cu esey ta stipula den e contract di huur;
• Pa no haci beheit strobando asina paz y armonia di otro bisiñanan;
• Paga huur manera acorda cu doño di cas;
• No mag biba e placa di deposito.