Ta importante pa e Consumidor conoce Leynan cu ta dune Derecho

"Sabiduria ta dunabo poder". Conocemento di nos leynan ta duna nos consumidornan e poder pa busca nan derecho. Nos leynan na Aruba ta duna e consumidor basta derecho riba diferente aspecto. Lamentablemente hopi di nos consumidornan no sa esaki.

"Hopi hende no sa cu tin leynan pa proteccion di consumidor". Esaki ta un di e resultadonan di un encuesta cu Despacho pa Asunto di Huur y Consumidor a haci recientemente. Casi mitar di esnan cu a responde no tabata sa cu nos tin e leynan aki. Esnan cu tabata sa cu tin ley, no tabata sa kico e ley ta encera y con e ta duna proteccion. E encuesta aki tambe a mustra cu den caso di disgusto no ta tur consumidor na Aruba ta escohe pa haci un reclamo.

Como consumidor bo mag di haci un reclamo y busca bo derecho tanten cu e tin rason. E consumidor mester ta conciente tambe cu no ta tur ora e tin derecho di cambia su producto pa un otro. Cambia producto no ta un derecho di consumidor, sino un servicio cu e negoshi por duna. Si acaso e producto tin un tipo di deficiencia, e ora si e negoshi tin deber di drecha of cambia e producto anto si acaso e no por cumpli cu esaki e tin di debolbe e consumidor su placa.

Aunke nos leynan ta duna basta proteccion e derecho mas importante pa e consumidor ta pa prome cu e consumidor haci un compra, e busca informacion y orientacion riba su escohencia pa asina haci un compra eficiente y bon informa.

Esaki nos ta yama un consumidor critico y atento. Despacho pa Asunto di Huur y Consumidor ta boga pe consumidor na Aruba bira mas critico y semper busca su derecho, conforme un dicho cu ta bisa "mihor bo siña un hende pisca cu pa regale un pisca".

Pa conseho of informacion riba un situacion cu a pasabo como consumidor yama libremente Despacho pa Asunto di Huur y Consumidor y conta nos bo caso. Despacho pa Asunto di Huur y Consumidor, Wayaca 33, tel: 5829914.