Follow up caso keho banco
Den cuadro di keho recien contra banco cu a blokia cuenta di cliente Dienst Huur- en Consumentenzaken ta informa
Den cuadro di e caso ultimo di blokiamento di cuenta di banco pa falta di un extracto di censo, Dienst Huur- en Consumentenzaken a revisa:
- E comunicado cu e banco a saca den medionan di comunicacion;
- Copia di e carta cu e banco a manda riba e topico pa su cliente (nan);
- Copia di e condicion nan general di e cuenta coriente di e banco concerni y
- E ley contra terorismo y labamento di placa.
Ora cualkier negoshi ta saca un comunicado den medionan di comunicacion local, e tin di compronde cu e ta manda informacion pa otro hende tambe cu no necesariamente ta su cliente. Ademas di esaki, un comunicado den medionan local no ta garantisa cu e informacion ta alcansa e cliente. Pa comunica informacion importante pa cliente cu ta afecta e servicio cu e cliente ta uza directamente e banco por scoge pa haci esaki den persona, telefonicamente of via carta/ e-mail. Un comunicado den corant of anuncio na radio of television no ta wordo considera suficiente.
Un otro aspecto ta cu e carta cu e banco a manda pa su clientenan no tabata informa cu lo blokia su cuenta si e no entrega extracto di censo. Cu otro palabra banco a haci un menasa publico pa su clientenan, pero den priva no a splica esaki.
Despues di revisa e ley contra labamento di placa y terorrismo, Dienst Huur- en Consumentenzaken a compronde cu e banco ta mara pa ley pa cumpli cu un identificacion y verificacion, pero cu e ley no ta exclui otro documento pa verifica e identificacion di e cliente. E banco por a pidi otro documento tambe pa cumpli cu ley, pero sinembargo a exigi apenas uno. Si nos bay mas profundo den e materia e ley ta indica cu e banco tin e obligacion di verificacion di e identificacion cliente. Cu otro palabra, e ta un obligacion cu ta solamente di banco! Ademas di esaki, e ley ta indica cu si e banco no por verifica e identificacion di e cliente e lo mester termina e relacion comercial di biaha. E ley no ta bisa cu e banco tin e derecho di blokia e cuenta di banco. Despues di revisa e condicionnan general di e banco, Dienst Huur- en Consumentenzaken a compronde cu blokiamento di cuenta di cliente pa falta di documento no ta aparece den e condicionnan general di e banco. Kiermen cu ni pa ley ni segun nan propio ‘policy’ e banco tabata tin derecho di blokia cuenta di e cliente.
Ademas di e puntonan menciona akiriba mester menciona tambe cu e cliente ta paga e banco pa haci un servicio pe; cu otro palabra e banco no ta bira doño di propiedad monetario di e cliente. E placa di e cliente ta placa di e cliente.
Un otro punto pa considera ta cu e banco como manehado di e placa di e cliente por mira di unda entrada di e clienta ta bin, cuanto e entrada di e cliente ta y tambe unda su entrada ta wordo gasta y por lo tanto cu un poco sentido comun por deduci si su cliente ta laba placa of si ta financia terorismo.
Despues di revisa tur documento menciona akiriba Dienst Huur- en Consumentenzaken a deduci cu e banco a maluza su poder pa di un forma incorecto y desproporcional perhudica su propio cliente.
Si acaso tin mas cliente inocente di terorisimo of labamento di placa pero perhudica pa e decision di e banco aki, por fabor tuma contacto cu Dienst Huur- en Consumentenzaken na 5829914.
Na e articulo aki bo no por adkiri derecho, pero pa mas informacion riba leynan cu ta trata derecho di consumido, haci un keho of registra un abuso contra consumido yama of pasa personalmente na Dienst Huur- & Consumentenzaken na Wayaca 33, tel: 5829914, bishita nos website: www.dhc.aw, “like” nos of conta un anecdota riba facebook, sigui nos via twitter of e-mail nos na This e-mail address is being protected from spambots. You need JavaScript enabled to view it..
Alerto consumido situacion Insel Air
Situacion di Insel Air Aruba pa Consumidonan
Recientemente a sali den medionan di comunicacion local cu corte den prome instancia na Aruba a declara e compania ‘Insel Air Aruba’ bancarota. Di fuentenan local y internacional no ta hopi duidelijk ainda kico lo pasa cu ‘Insel Air International’ na Curacao.
Den cuadro di e noticia aki Dienst Huur- en Consumentenzaken kier alerta consumido na Aruba cu kier cumpra ticket den e periodo aki, cu tanten no tin claridad di ‘Insel Air International’, pa tene cautela ora di cumpra ticket pa vuelo. Pues, si e aerolinea stop di opera lo tin como consecuencia di no por cumpli cu e acuerdonan di biahe. E consumido lo mester manda carta pa e curator y puntra pa debolbe e placa. Esaki ta un proceso largo y sin garantia di haya placa bek.
Ora cu corte declara un compania bancarota, e curator ta haya e ehercicio di trece e activa y pasiva di e compania den bista. E curator lo mester tambe evalua tur reclamo door di acredornan. Siguientemente e curator, si acaso resta placa, lo determina un suma y reparti e suma aki entre e acredornan. Esaki ta un proceso cu por tuma hopi tempo y e consumido pa ley ta un di e ultimo acredornan pa yega na turno. E consumido su probabilidad di haya placa back por ta chikito of den cierto caso te hasta nihil.
Den cuadro di situacion di ‘Insel Air’ Dienst Huur- en Consumentenzaken kier informa consumidonan cu si acaso ta asina leu cu e consumido keda perhudica pa motibo di cancelacion di vuelo pa motibo di bancarota, Dienst Huur- en Consumentenzaken lo saca mas informacion con pa yuda e consumido.
Servicio Online
Servicio di Huur y Consumido obtenibel riba Internet
Dienst Huur- en Consumentenzaken ta asisti cliente completamente gratis cu informacion, conseho y tambe cu intermediacion ora tin disputa. Tanto riba asunto di huur como riba asunto di consumido por presenta un keho of desacuerdo. Un keho ta un expresion di un malcontento y esaki por sosode facilmente. Ley ta duna guia con pa actua na momento cu tin un keho of desacuerdo.
Tur hende por cuminsa busca su derecho via nos website (www.dhc.aw) cu informacion of pa haci peticion pa nos servicio di huur of consumido. Despues di manda e peticion via nos website, mas pronto posibel un funcionario lo tuma contacto pa duna asistencia.
Servicio di huur
Sea e cliente ta doño di un propiedad of e ta un inkilino semper por presenta un situacion den cual mester ayudo profesional, manera daño na e propiedad, mantencion di e propiedad, problema den pago di huur, terminacion di contract di huur, etc. E servicio di huur ta obtenibel riba e siguiente link: http://www.dhc.aw/aw/keho-y-desacuerdo/formulario-di-keho-huur
Servicio di consumido
Si acaso e consumido haya su mes den problema of conflicto cu un negoshi pa motibo di por ehempel un producto defecto of incumplimiento di servicio, esun cu posicion mas debil ta e consumido. Pues, keho di consumido por causa hopi frustracion si acaso e negoshi nenga di duna cooperacion den e proceso stipula pa ley. Dienst Huur- en Consumentenzaken por mustra e consumido paso a paso ki caminda pa cana pa yega na su derecho y ofrece posibel herment cu por yuda soluciona e conflicto. E servicio di consumido ta obtenibel riba e siguiente link: http://www.dhc.aw/aw/keho-y-desacuerdo/formulario-di-keho-consumido
Conseho huridico
Ademas di nos servicio di huur y di consumido, Dienst Huur- en Consumentenzaken ta ofrece servicio huridico. E servicio aki ta encera ayudo huridico di prome grado cual ta enfoca riba servicio preventivo, diagnostico y atendimiento di conflicto. Esaki ta encera duna informacion, conscientisacion riba derecho, posicion huridico y posibel consecuencianan, duna conseho, pero tambe skirbi carta den nomber di e cliente.
Cliente perhudica pa banco
Dienst Huur- en Consumentenzaken ta yama tur cliente cu ta inocente di labamento di placa y terorismo pero perhudica pa blokiamento di cuenta di banco
Den cuadro di un comunicado di prensa cu un banco local a saca recientemente den medionan di comunicacion menasando cliente cu lo cera of blokia cuenta di banco, Dienst Huur- en Consumentenzaken kier informa lo siguiente:
Segun ordenansa pa prevencion y combatimento di labamento di placa y terorismo (landsverordening voorkoming en bestrijding witwassen en terrorismefinanciering, AB 2011 no.28), banco ta obliga pa entre otro investiga y verifica e identificacion di e cliente. Articulo 19 di “ ordenansa prevencion y combatimento di labamento di placa y financiamento di terorismo” (AB 2011 no. 28): “Si acaso e cliente ta un persona fisico, por verifica su identidad por medio di documento, dato of informacion nan di fuente independiente y confiabel”.
Dienst Huur- en Consumentenzaken a compronde di Centrale Bank cu tin diferente manera cu e banco por haci esaki. Ademas Dienst Huur- en Consumentenzaken por a comprondo di articulo 9, lid 1 di e mesun ley cu e banco ta prohibi di establece un relacion comercial y/ of haci un transaccion si e no por cumpli cu e investigacion di cliente.
Ley “Regeling verificatie documenten LWTF” (AV 2012 no 11), articulo 1 inciso 1 ta bisa: “Como documento riba cual por cumpli cu articulo 19 (verificacion di identidad), inciso 1 y 5, di e ordenansa pa prevencion y combatimento di labamento di placa y financiamento di terorismo ta señala:
- un documento di biahe valido, manera indica den articulo 2 di ley di Paspoort (Stb 1991, 498);
- un rijbewijs valido, manera indica den articulo 10, inciso uno of dos, di ordenansa wegverkeer (AB 1997 no. 18);
- un identificacion valido, manera indica den articulo 2, inciso uno di ordenansa identiteitskaarten (AB 2001 no. 8);
- un documento di biahe valido emiti pa e autoridad di e pais di procedencia y cu ta dispone di 1o number di registracion di e titular; 2o pasfoto di e titular; 3o nomber y fam di e titular; 4o fecha di nacemento y luga di nacemento di e titular; 5o e pais y instancia di emision; 6o fecha y luga di emision di e documento di biahe; 7o. fecha di vencimento di e documento di biahe”.
Manera por a lesa aki riba, segun ley tin diferente documento cu e banco por uza pa verifica e identidad di e cliente.
Dienst Huur- en Consumentenzaken a ricibi keho di consumido cu cuenta di banco a keda blokia, cu e forma con e proceso aki a sosode por ta hopi irasonabel pa e consumido. Pa e motibo aki Dienst Huur- en Consumentenzaken ta urgi tur consumido cu a keda perhudica pa motibo di e decision aki pa pasa personalmente of yama Dienst Huur- en Consumentenzaken na 5829914 pa informa esaki.
Na e articulo aki bo no por adkiri derecho, pero pa mas informacion riba leynan cu ta trata derecho di consumido, haci un keho of registra un abuso contra consumido yama of pasa personalmente na Dienst Huur- en Consumentenzaken na Wayaca 33, tel: 5829914, bishita nos website: www.dhc.aw, “like” nos of conta un anecdota riba facebook, sigui nos via twitter of e-mail nos na This e-mail address is being protected from spambots. You need JavaScript enabled to view it..
Dia Mundial Derecho Consumido 2017
Dia Mundial di Derecho di Consumido
Dia mundial di derecho di consumido ta un oportunidad pa trece dilanti topico nan di interes pa e consumido. E fecha aki a keda inspira pa e president Mericano J.F. Kennedy, kende a duna un discurso riba 15 di maart 1962 na e congreso di su pais, den cual e presidente formalmente ta toca e asunto di derecho di consumido. E tabata e prome lider mundial pa tuma e paso aki. Despues Nacionnan Uni riba 15 di maart 1983 a proclama pa prome biaha e dia aki como dia mundial di derecho di consumido. E fecha aki internacionalmente ta haya atencion specialmente di e organisacion “Consumer International”. Cada aña e organisacion internacional aki ta scoge un tema y e tema pa 2017 ta: “Construyendo un mundo digital cu e consumido por confia”.
Na Aruba e tema internacional aki tambe tin cierto significativo. Nos como consumido mes ta expresa un necesidad pa haci tur servicio cu nos ta uza mas moderno, mas lihe, mas accesibel, mas facil, mas miho, etc. E compania di servicio cu ta reacciona riba nos necesidad ta brinda loke nos ta pidi y nos ta mira mas y mas servicio ta ofrece un aplicacion riba celular, un website pa cumpra servicio y haci pago, etc. Bo por bisa cu mientras tecnologia ta avansa y nos como consumido ta bira cada bes mas dependiente di e avancenan tecnologico, nos ta bira alavez mas vulnerabel na invasion riba nos privacidad y siguridad di informacion. Invasion di informacion priva por ta inofensivo manera un compania di mercadeo cu ta busca informacion basico pa haci promocion, pero e por ta peligroso tambe manera un ladron cu ta busca informacion confidencial manera pin-code pa haci robo.
Mientras cu internacionalmente y nacionalmente e topico aki tin significativo pa nos tur como consumido, Dienst Huur- en Consumentenzaken kier bolbe remarca e necesidad cu e consumido na Aruba tin pa un forma pa resolve keho di consumido sin necesidad di bay corte, manera un comision di consumido. Dienst Huur- en Consumentenzaken ta atende keho individual di consumido cu conseho y den cierto caso cu intermediacion. A base di e experiencia di Dienst Huur- en Consumentenzaken cu atendemento di keho, nos kier reitera cu ainda tin varios negoshi cu ta ignora e derecho di e consumido.