Con pa scirbi un carta di keho?
Como un bon consumidor, bo tin derecho pa expresa bo malcontento. Es mas, si bo tin un keho riba un producto pa motibo di por ehempel defecto riba producto ley ta pidi pa comunica bo keho por escrito cerca e comerciante. Scirbi un carta di keho ta simpel y e no mester ta largo.
Carta di keho ta un forma efectivo pa expresa desatisfacion cu un producto of servicio. Un carta ta mihor cu un keho verbal, pasobra por escrito e palabranan ta keda fiho y ta zona mas fuerte. Ademas, ora bo ta scibri carta bo tin mas tempo pa pensa bon y expresa bo mes mihor cu palabra e keho.
Aki bao ta sigui algun ehempel di carta di keho:
- Con pa scirbi carta di keho pa producto defecto,
Carta_reparacion_of_reemplace_producto_defectuoso.doc - Con pa scirbi carta di keho pa servicio malo, Carta_pa_termina_acuerdo_di_servicio.doc
Un di e cosnan mas importante ora ta scirbi un carta di keho ta cu e mester yega na e departamento y persona indica. Generalmente e informacion aki ta disponibel sea riba e producto mes of riba e recibo di compra. Mantene e carta cortico y simpel mientras bo ta menciona tur e hechonan di un manera cla. Inclui sigur e nomber di e producto, number di recibo, fecha y lugar di compra. Si ta trata di un polisa, menciona aki den e number di polisa.
Ta hopi importante pa bo menciona pakico bo no ta contento cu e producto of servicio ey en particular. Trata di ta specifico ora bo ta splica e problema y trata di no haci declaracion mucho liher. E tono di e carta mester ta cortes pero firme. Ta mihor pa evadi declaracionnan fresco of sarcastico pasobra nan no ta yudabo den nada. Ta mihor pa tume di un manera formal y obhetivo cu purba di hunga riba sentimiento di hende.
Bo por menciona con bo ta desea pa rectifica e problema. E por ta den forma di haya placa back, reemplaso di producto of cualkier otro metodo cu bo ta haya mas apropia. Corda menciona cu bo ta dispuesto pa tuma pasonan mas leu.
Percura pa e nomber y adres di e contrapartido ta cuadra. Purba menciona den e carta e nomber di e persona cu a yudabo. Saludo: Pone riba e carta “Apreciabel meneer/ señora”. Dirigi bo mes na un persona cu su nomber y menciona tambe su fam. Finalisa cu “Antentamente”, bo nomber cla y lesabel cu un firma. Menciona hopi cla bo nomber, adres y otro informacionnan di contacto (number di telefon, eventual e-mailadres).
Despacho pa Asunto di Huur y Consumidor ta desea bo hopi exito cu bo carta di keho, pues e ta un di e prome pasonan pa yega na bo derecho. Pa conseho of informacion riba un situacion cu a pasabo como consumidor yama libremente Despacho pa Asunto di Huur y Consumidor y conta nos bo caso. Despacho pa Asunto di Huur y Consumidor, Wayaca 33, tel: 5829914.