Consumido mes protehe su mes contra abuso di prijs
Proteccion di consumido kiermen cu e consumido mes ta protehe su mes contra abuso di prijs
Gobierno no ta controla prijs di tur comestibel pasobra Aruba conoce un mercado liber. Esaki significa cu Gobierno ta tene supervision di prijs riba apenas productonan di canasta basico. E canasta basico ta consisti di sucu, koffie, lechi en polvo, lechi di koffie, pan blanco, té, aros, hariña, sucu, cuminda di baby, manteca, margarina, azeta di cushna, webo y pisca. Control di prijs di productonan di canasta basico ta cay bao Directie Economische Zaken. Pa mas informacion riba e prijsnan di producto nan cu ta pertenece na e canasta basico mester tuma contacto cu Directie Economische Zaken.
Mercado liber ta un sistema den cual prijs pa producto y servicio ta liber bao consentimento di bendedo y consumidor, den cual forsa di demanda y suministro ta liber for di intervencion di Gobierno, monopolio di prijs y otro autoridad. E implementacion efectivo di mercado liber ta rekeri pa tin competencia husto. Un mercado eficiente y efectivo ta esencial pa un economia fuerte y stabil, fuente di trabao y abastecimiento di productonan cu ta cumpli cu nos necesidadnan diario y servicionan cu ta defini nos estilo di bida.
E pensamento tras di un mercado liber ta cu tienda ta bende dependiendo di e demanda di e consumido. Pues, e consumido den un sistema di mercado liber ta esun cu poder di compra. Den un economia di mercado liber e demanda di consumido ta determina e benta di producto of servicio riba mercado. Si e consumido stop di cumpra un producto, e tienda lo stop di ofrece e producto den tienda. Den practica kiermen cu si un supermercado ta bende bleki tuna mas caro cu su competidornan, na final e competidornan lo bende mas bleki tuna.
Den un mercado liber cu ta funciona bon e consumido y e negoshi ta yega na otro na un prijs cu ta husto pa tur dos. Pero den un mercado den cual e negoshi ta hopi spierto, e negoshi lo stipula un prijs cu ta combinie mas hopi pensando cu e consumido ta cumpre toch. Si e negoshi ripara cu e consumido ta keda cumpra aunke cu e prijs subi, e negoshi lo keda pusha e prijs pa e subi mas. Esaki ta algo cu por pasa na Aruba si e consumido Arubiano no reclama prijs halto. Si nos como consumido kier reduci aumento di prijs, nos tin di pone cabes hunto y laga producto caro riba shelf para.
Na e articulo aki bo no por adkiri derecho, pero pa mas informacion riba leynan cu ta trata derecho di consumido, haci un keho of registra un abuso contra consumido yama of pasa personalmente na Dienst Huur- & Consumentenzaken na Wayaca 33, tel: 5829914, bishita nos website: www.dhc.aw, “like” nos of conta un anecdota riba facebook, sigui nos via twitter of e-mail nos na Dit e-mailadres wordt beveiligd tegen spambots. JavaScript dient ingeschakeld te zijn om het te bekijken..
Conseho ora di cumpra cas parti 2
Conseho ora di cumpra cas parti 2
Den e articulo anterior a trata deber di investigacion cu ta encera e deber di e consumido pa averigua bon prome cu e haci un compra importante manera un cas. Na e otro banda di e deber di e consumido pa averigua, e bendedo tin un deber di notificacion. E articulo aki lo enfoca riba e deber di notificacion di e bendedo.
Ora di cera un acuerdo di compra e bendedo no mester tene cuenta solamente cu su propio interesnan. E mester tene cuenta tambe cu e interesnan di e cumprado. Esaki ta hiba cune cu e cumprado (consumido) riba peticion of sin peticion mester wordo informa di e echonan cu ta coresponde cu e benta di e cas. Esaki ta e deber di duna informacion di e bendedo.
E deber di duna informacion ta existi si e bendedo conoce e fayo, por ehempel e bendedo sa cu e tera ta contamina, cu tin molester di sonido duro, un vloer afecta cu no ta visibel y un dak cu lekkage. E bendedo por tin e deber di notifica tambe si acaso solamente e tin e sospecho di e fayo. Asina Hoge Raad a determina den un caso den cual e bendedo tabata tin apenas sospecha cu e suelo tabata contamina, toch tabata tin e deber di avisa cu lo tabata existi un riesgo grandi (HR 14 november 1997, NJ 1998, 657 (Holvrieka/Brunink).
Si acaso ta papiando di un bendedo experto, bao cual tambe ta compronde e bendedo cu ta laga su mes wordo asisti door di un real estate agent (broker), por lo general lo papia di un deber di notificacion di banda di e bendedo. Esaki pasobra e bendedo experto ta wordo pensa di tin mas conocemento di e cas cu lo wordo bendi y e interesnan di e cumprado. Den duna informacion mucho compacto e cumprado hopi biaha no tin mucho na dje. E bendedo ta obliga pa duna e cumprado tur informacion esencial. Di otro banda e bendedo no mester duna notificacionnan di caracteristicanan cu e cumprado por mira di un manera simpel caba. Pensa riba scheur den muraya of luganan cu humedad. Si e bendedo no cumpli cu su deber di notificacion, e probabilidad ta grandi cu e lo mester di drecha e fayo na e cas, paga pa indemnisacion, of te hasta anula e benta.
Kico ta mas pisa? Deber di investigacion of deber di notificacion? Si acaso un bendedo no a cumpli cu su deber di notifica e bendedo no por huy for di su responsabilidad door di bisa cu e cumprado mester a investiga miho. Tambe ta sosode den circunstancianan excepcional cu e hues ta di opinion cu si acaso e bendedo duna insuficiente notificacion y e cumprado haci insuficiente investigacion, e daño ta keda reparti.
Na e articulo aki bo no por adkiri derecho, pero pa mas informacion riba leynan cu ta trata derecho di consumido, haci un keho of registra un abuso contra consumido yama of pasa personalmente na Dienst Huur- & Consumentenzaken na Wayaca 33, tel: 5829914, bishita nos website: www.dhc.aw, “like” nos of conta un anecdota riba facebook, sigui nos via twitter of e-mail nos na Dit e-mailadres wordt beveiligd tegen spambots. JavaScript dient ingeschakeld te zijn om het te bekijken..
Conseho ora di cumpra cas parti 1
Conseho ora di cumpra Cas, parti I
Dienst Huur- en Consumentenzaken ta conseha tur consumido pa ta alerto ora di cumpra un cas. E cas por tin fayonan scondi cu ta aparece te despues di un tempo. Den caso di fayonan scondi ley ta wak e deber di investigacion di e consumido y e deber di notificacion di e bendedo. Pues na momento di cumpra un cas e consumido tin deber pa haci un investigacion di e cas y e bendedo tin e obligacion pa notifica tur fayo conoci na e momento ey.
E articulo aki lo enfoca riba e deber di investigacion di e consumido. E deber di investigacion ta trata e obligacion di e cumprado pa investiga bon kico e ta cumpra. E cumprado mester cautelosamente y activamente busca informacion di e propiedad. E deber di investigacion ta trece cune cu e consumido ta inspecciona e cas cuidadosamente, y si ta necesario ta busca un experto. Tambe ta consehabel pa e consumido haci tur pregunta relevante na e bendedo, manera pregunta riba e localidad, e tipo di tereno, saltpeter, etc.
E deber di investigacion ta conta mas tanto pa caracteristicanan cu ta relativamente facil pa haya y no pa caracteristicanan cu ta hopi dificil pa investiga. Cualkier notificacion cu e bendedo haci, e cumprado mag di kere esakinan y no mester investiga e notificacionnan ey mas. Sin embargo si e bendedo no ta cla (duidelijk) cu su notificacionnan, e cumprado por exigi mas investigacion. Pensa riba por ehempel na e geval cu tin mancha den plafond, pero e bendedo ta bisa cu e dak ta den bon estado. E cumprado asina ey mester evita di cay bao influencia di un suposicion robes di loke e ta cumpra.
E deber di investigacion di e cumprado ta bira mas pisa si ta trata di un cas bieu. Na compra di casnan bieu pues tin mas riesgo mara na dje pa loke ta trata e estado arquitectónico y asuntonan manera e floer, e dak y instalacionnan. Di cumpradonan di cas bieu por spera di nan cu nan ta busca expertonan pa por cumpli debidamente cu nan deber di investigacion.
Si e consumido no mantene su mes na e deber di investigacion e por tin consecuencia den su desbentaha si acaso despues e propiedad resulta di tin fayo scondi. E consecuencianan huridico por bay hopi leu. Un cumprado cu no a cumpli cu su deber di investiga ta corre riesgo cu e no por cobra e daño cu ela sufri door di cumpra e propiedad. Den un procedura legal e cumprado (consumido) lo mester demostra na hues a base di prueba y circunstancianan cu e bendedo no a cumpli cu su deber, cual hopi biaha ta wordo basa riba articulo 7:17 lid 2 di nos codigo civil (exigencia di conformidad). Ademas e consumido tin un deber di keho cu ta encera cu e mester notifica e defecto (of 'tekortkoming') mas lihe posibel na e bendedo (art. 7:23 lid 1 di nos codigo civil). En general ta conta cu maximo 2 luna despues cu consumido a constata e fayo scondi ("verborgen gebrek"), esaki mester wordo notifica cerca e bendedo. Por ultimo ta consehabel pa haci esaki por escrito den cuadro di un prueba di entrega.
Na e articulo aki bo no por adkiri derecho, pero pa mas informacion riba leynan cu ta trata derecho di consumido, haci un keho of registra un abuso contra consumido yama of pasa personalmente na Dienst Huur- & Consumentenzaken na Wayaca 33, tel: 5829914, bishita nos w ebsite: www.dhc.aw, “like” nos of conta un anecdota riba facebook, sigui nos via twitter of e-mail nos na Dit e-mailadres wordt beveiligd tegen spambots. JavaScript dient ingeschakeld te zijn om het te bekijken..