DIA MUNDIAL DI DERECHO DI CONSUMIDOR 2022

Nos tur ta consumidor den nos bida diario. Companianan mundialmente ta gasta biyones di dollars tur aña na ‘marketing’ dirigi na bo persona. Esaki ta nifica cu tur dia bo ta experiencia miles di propaganda cu ta competi pa bo placa. Pero bo no ta sin poder. Door di paga bon atencion, haci un poco investigacion y tin un poco pasenshi bo por recobra e control como consumidor.

15 di maart

Ta pesey ariba 15 di maart nos ta celebra Dia Mundial di Derecho di Consumidor. Esaki ta un evento global cu tin como meta pa concientisa y boga pa derechonan di consumidor. Cada anja, organisacionnan di consumidor ta marca e dia aki door di uni hunto pa asina enfoca y concientisa ariba un topico cu ta importante pa consumidornan ariba henter e mundo. 

Tema 2022: Fair Digital Finance

E organisacion Consumers International a scohe ‘Fair Digital Finance’ como tema pa Dia Mundial di Derecho di Consumidor pa e anja 2022. Durante di henter e siman di 14-18 di maart 2022 lo tin un foro unda tur hende por inscribi y participa na diferente sesion online ariba e topico menciona via di nan website www.consumersinternational.org. Full rond mundo e uzo di servicio financiero digitalisa ta aumentando. Na Aruba tambe por observa cu mas transacionan ta tuma lugar via online banking, paypal, pay.aw y diferente debit cards di diferente companianan. Ta premira cu e uzo di servicionan financiero digitalisa lo bai sigui aumenta. Pa es motibo ta importante pa percura cu tin servicionan fianciero digitalisa cu ta inclusivo, sigur, data priva/protehi y sostenibel. Sinembargo, apesar cu tin un crecemento den uzo di productonan finaciero digitalisa, nos por bisa cu den comparacion cu otro partinan di mundo nos falta mas regulacion pa e tipo di servicionan aki. Pa lesa e articulo completo por bishita nos website dhc.aw. 

Historia di Dia Internacional di Derecho di Consumidor

Dia Internacional di Derecho di Consumidor a wordo inspira door di Presidente John F. Kennedy, cu a duna un speech special na e Congreso Mericano ariba 15 di maart 1962, den cual ela adresa formalmente e tema di derecho di consumidor. E tawata e prome lider mundial pa haci esaki. E movimento di consumidor a marca e fecha aki pa prome biaha den 1983 y awor ta haci uso di e dia aki tur aña pa mobilisa accion ariba topiconan y campañanan importante.

Ken tin derecho di consumidor?

Derecho di consumidor ta encera cu cualkier persona cu ta cumpra un product of servicio for di un compania of practicante profesional tin e derecho pa haya informacion di e calidad, prijs y normanan di e producto of servicio cu e ta cumpra. Segun Consumers International “derecho di consumidor ta relata na nos derecho pa tin acceso na e cosnan basico cu nos mester pa biba, incluyendo cuminda, refugio y awa limpi pa bebe. E tin di haber cu percura cu bo television no ta daña dentro di 3 luna, cu bo auto tin e caracteristicanan y e tecnologia pa bo por core sin peliger, y cu e datos cu companianan ta colecta di bo persona online no ta perdi of horta.”

Ta mas den control di bo gastonan

Dia Mundial di Derecho di Consumidor tin di haber cu haci uso di nos derechonan y gasta nos placa den un manera sabi y sostenibel. Aki ta sigui algun manera cu por ta mas den control di bo gastonan.

• Marketing

            E prome cos cu bo mester considera ora di un compra, especialmente si e ta algo cu pafor di bo necesidanan basico, ta kiko ta incentiva pa e compra y ken lo benificia berdaderamente di e compra. Cu tur e informacion y ciencia obtenibel awendia, companianan conoce bo mihor cu bo            mes. Ta importante pa refleha y percura cu ta bo decision pa gasta bo placa y no door di manipulacion causa pa ‘marketing’. 

            E caminda cu un product wordo poni den un tienda, e manera con un marca ta lagabo sinti,       benta y promocionnan cu ta mara na un periodo limita, areglonan di pago conveniente, tactica   di financiemento – tur esakinan ta trampanan comun pa e consumidor diario. Corda cu semper e compania ta percura pa e haci ganashi, hasta ora di promocion y descuento. 

• Cumpra conciente

            Percura cu bo ta sigur di cada compra cu bo haci. Controla si bo ta na haltura di e condicionan    general. Kisas bo no ta capas di lesa tur cos, pero tene cuidao cu e puntonan importante aki: e     maneho di compania pa cambia e producto, e periodo di garantia, y si ta trata di un compania cu            ta inscribi na Camera di Comercio.

• Busca bo derecho

            Por ultimo ta bon pa ta na haltura di unda pa acudi ora cosnan bai robes. Si bo kier entrega un   keho di consumidor y bo no ta logra di resolve esaki cu e compania ariba bo mes, por fabor tuma      contacto cu nos depratamento, Servicio na Defensa di Consumidor. Nos lo registra bo keho,       dunabo e informacion relevante encuanto bo derechonan, conseho huridico y tambe nos por       intermedia den e caso pa asina yuda yega na un solucion of un acuerdo entre partidonan. Den caso di estafa, fraude, scams of otro actividad penal, haci denuncia na polis, Landsrecherche of na bo banco. 

Conclusion

Con bo  ta gasta bo placa ta bo decision. Door di ta conciente di tacticanan di marketing, ta bon informa y sigur di bo decision pa haci un compra y door di haci uso di bo derechonan cu ayudo di instancianan concerni bo por tin mas control como consumidor.

Felis Dia Mundial di Derechonan di Consumidor!

Pa mas informacion tuma contacto cu Servicio na Defensa di Consumidor na telefon 5829914, bishita nos website www.dhc.aw of nos pagina di Facebook ‘Dienst Huur- en Consumentenzaken’ of bishita nos na Wayaca 33-E.

Dia mundial di derechonan di consumido y Dia mundial di trabounan social.

Awe, 16 di maart 2021, nos ta celebra e trabao importante cu tur trahador social ta haci pa yuda nos comunidad. E aña aki, cu tur e retonan social cu e pandemia a trece cune, ta duna mas rason cu nunca pa celebra y aprecia nos trahadornan social y gradici nan pa nan trabao.

Ademas, aunque nos ta un dia laat, nos kier tuma e oportunidad aki pa celebra y enfoca tambe ariba Dia Mundial di Derechonan di Consumidor, cu a wordo celebra internacionalmente ayera 15 di maart 2021.

Dia mundial di derecho di e consumido ta un ocacion pa pone enfoke riba e poder di e consumido y e derecho di tin un mercado husto, sigur y sostenibel pa tur hende. E dia di consumido aki (15 di maart 2021), consumidonan lo uni pa tackle contaminacion plastico (Plastic Pollution).

Actualmente nos ta enfrentando un crisis mundial di contaminacion plastico. Aunke plastic ta un material hopi util den nos bida diario, nos consumo y produccion di plastic ta algo cu no ta sostenibel.

E rapport di Pew Charitable Trust y SYSTEMIQ, ‘Breaking the Plastic Wave’, cu a sali na augustus 2020, ta calcula cu e fluho di materialnan plastico den lama lo triplifica na 2040 si inovacionnan y cambionan legislativo principal y nos comportamento no cambia.

Aruba ta activo riba e tereno aki y nos por recorda cu ariba 1 di juli 2020, e “Landsverordening verbod voor het milieu schadelijke producten” (AB 2019, no. 67) a bin na vigor. Nos por ripara cu e bendemento y uzo di plastic y foam na Aruba ta cambiando pa articulonan di materialnan “biodegradable” cu tin menos impacto riba e medio ambiente. Tambe, mester menciona cu pronto lo por spera  e “ Landsverordening aanvulling BWA” yega na vigor. Esaki lo trece cune varios benificio pa e consumido. Algun punto importane cu lo spera ta lo siguiente:

1.      Koop van onroerende zaken (moet voortaan schriftelijk, drie dagen bedenktijd),

2.      Aanneming van werk (moet voortaan schriftelijk, op straffe van nietigheid, akte moet terhand worden gesteld)

3.      Consumentenkoop op afstand (overeenkomsten gsloten via internet, telefon, fax of post) (bedenktijd van zeven dagen, prijs inclusief alle aanvewante kosten).

Awo ta un momento critico pa nos enfoca, adresa y tackle e contaminacion plastico. Mirando cu e pandemia COVID-19 ta contribui na e uzo di plastic pa un solo uzo, incluyendo mask, handschoen y paketahe di cuminda. 

Dienst Huur- en Consumentenzaken (DHC) su oficina ubica na Wayaca 33, lo ta cera diamars 22 di september 2020, en conexion cu limpiesa, fumigacion y desinfeccion. Dienst Huur- en Consumentenzaken ta pidi disculpa pa cualkier inconveniencia y ta gradici pa e comprension. Por continua entrega keho of peticion online via https://formulieren.dhc.aw of manda nos un email na info@dhc.aw. Pa mas informacion por bishita nos website http://www.dhc.aw. 

Dia 3 di september 2020, Huurcommissie a tuma e decision cu en conexion cu e di dos brote di COVID-19 na Aruba, teniendo na cuenta e edad halto di su miembronan y e riesgo grandi cu esaki ta trece cune, lo descontinua temporalmente cu e bishitanan pa haci calculacion di prijs ‘huurprijsvaststelling’ (HPV). Esaki lo tin como consecuencia cu e peticionnan di HPV lo keda pendiente te cu proximo aviso di Huurcommissie.

Nos di DHC ta pidi nos disculpa na tur esnan afecta pa e desicion aki y pa cualkier inconveniencia cu esaki por causa.

Dienst Huur en Consumentenzaken (DHC), ta informa tocante pagina web pa entrega peticion online.

Desde 04 augustus 2020 por bishita https://formulieren.dhc.aw pa entrega peticion na DHC y Huurcommissie. Ta trata di petcion pa: Evalua e prijs di huur, aprobacion pa hisa e prijs di huur y pa termina relacion di huur. Tambe, por entrega peticion na e departamento di inspeccion di DHC. Tur peticion completa online, mester wordo manda na verzoeken@dhc.aw. Si bo persona yena informacion incorecto of incompleto, DHC lo no por procesa bo peticion. Si bo persona no ta sigur cua formulario mester yena, si ta desea pa intermediacion of ta desea informacion general, ta consehabel pa tuma contacto cu nos via email info@dhc.aw, via nos website of tuma contacto cu nos na Tel: 582-9914.

Procedura pa entrega peticion

1. Lesa e instruccion nan con pa yena e formulario (na final di documento).
2. Download e formulario necesario.
3. Completa e formulario y segura cu e informacion cu bo persona a yena ta corecto.
4. Añadi documentonan necesario: copia di identificacion, contract di huur y recibo di pago di huur.
5. Entrega e formulario. Tin tres opcion pa cu entregamento di e formulario:                        Opcion uno (1): E-mail e formulario y documentonan pa verzoeken@dhc.aw (Ta acepta sin firma).Opcion dos (2): Print, firma y scan e formulario. E-mail esaki hunto cu e documentonan pa verzoeken@dhc.aw. Opcion tres (3): Print y firma e formulario, añadi e documentonan y pasa laga esaki na nos oficina situa na Wayaca 33.
6. Ricibi confirmacion di bo peticion via di e-mail.
7. Mester presenta cu version original y firma na momento di reunion.

Entrante dialuna 1 di juni 2020, DHC lo ta habri pa asina por brinda servicio na publico teniendo na cuenta precaucion y medidanan relaciona cu COVID-19 tanto pa empleadonan como e bishitantenan. DHC ta pidi comprencion di publico ya cu lo permiti den edificio solamente 5 bishitante pa ta paden y mester mantene distancia den e edificio di 1.5 meter y evita bin den contacto cu otro.

Ta pidi pa haci uzo di sanitizer cu lo ta disponibel den edificio y laba man. Tambe ta pidi encarecidamente pa esnan cu tin symptomanan di tosamento, dolor di garganta of otro simptoma relaciona cu Covid 19 pa proteccion di otro bishitantenan y trahadornan pa keda cas y hasi uso di servicio telefonicamente.

Servicio online pronto lo ta disponible asina tambe por haya e formularionan necesario pa yena.

Dienst Huur en Consumentenzaken (DHC) ta trece e siguiente articulo dilanti basa riba cifranan di keho pa cu aña 2018. A observa pa cu aña 2018 e categoria cu a recibi e porcentahe mas halto di keho tabata “Auto y Garashi”. Sinembargo, mester menciona cu despues di a ricibi kehonan, mayoria di compania di auto y garashi a sa di coopera cu DHC y resolve e kehonan exitosamente. DHC kier trece consehonan pa minimalisa e posibilidad cu algo lo bai robes ora ta trata di compra, drechamento of garantia di auto y con e consumido por percura pa e ta fuerte para si algo bai robes toch. 

Siguintemente lo duna conseho riba aspectonan specifico cu a manifesta nan mes den kehonan ricibi na DHC. Den comienso ora ta trata di un acuerdo di compra e cumprado ta paga (na tempo) un prijs y e bendedo ta entrega un product en cambio, asina pasando e propiedad over na e cumprado. Hopi biaha ora ta trata di drechamento di auto esaki ta un poco diferente. Mayoria di biaha e ta un combinacion di un acuerdo di compra y un acuerdo di servicio, caminda cu e garashi di auto ta drecha e auto pa un prijs y alabes ta cumpra of bestel e piesanan cu ta necesario.

Tip 1: (Palabracion y acuerdo nan por escrito)

Palabra por escrito kiko specificamente lo drecha y cua ta e piesa nan specifico cu ta nesecario pa cu esaki. Semper ora ta trata di cambio di piesa, exigi pa entrega e piesa biuew bek despues cu termina e trabou. Tambe ta importante pa stipula un fecha por escrito cu e trabou lo mester ta completa. Si ta posibel, lo ta consehabel pa na momento cu ta entrega e auto pa laga hasi un analisis completo di e auto y raporta esaki por escrito. Palabra di antemano  por escrito cu cualkier trabou extra cu ser constata despues di e palabracion inicial mester un confirmacion por escrito di e consumido prome cu por eherce e trabou extra. Ta conseha pa no hasi acuerdonan verbal paso ta mas dificil pa prueba despues cu tabata tin un acuerdo.

Tip 2: (Periodo di entrega keho)

Semper ta consehabel pa entrega keho asina cu constata algo robes y entrega e keho por escrito preferibel via post, compania di entrega of e-mail. Tin biaha no ta asina simple pa determina un fecha di completacion, por ehempel: Kisas e piesa cu a bestel a dura mas largo pa yega Aruba cu a premira of kisas e no ta den stock actualmente, kisas e trabou a dura mas largo cu a spera. Den tur caso ta importante pa sa cu e consumido no por apela cu locual a wordo entrega no ta conforme e acuerdo, si e no avisa e bendedo of mecanico di e inconformidad mas liher cu ta posibel despues di a descubri esaki of rasonablemente lo por a descubri esaki. Den caso cu e bendedo of mecanico a declara explicitamente cu e piesa of servicio lo tin di cierto propiedadnan y ta resulta cu esaki no ta asina, of den caso cu e bendedo of mecanico tawata sa of por tawata sa di cierto factornan cu ta relaciona cu e inconformidad pero a keda sin informa e consumido di esaki, e aviso di inconformidad dor di e consumido mester sosode mas liher posibel despues cu a descubri e inconformidad. Si bo persona laga bo auto pa mas cu 2 aña na un garage di auto sin avisa pa medio di carta y si nan bisa bo pa busce y bo no cumpli, nan por bai over na cobra bo persona pa warda e auto pabo.

Tip 3: (Recibo)

Semper ta consehabel pa exigi un recibo ora ta trata di cualkier compra of servicio. Den caso di drechamento di auto esaki mester extra atencion. Ora ta trata di drecha auto of ta autorisa e garashi pa cumpra/bestel piesanan di auto, mester zorg pa riba bo recibo ta para specificamente kico a drecha of kico a cumpra. Si riba bo recibo ta para solamente e suma final y un discripcion cu no ta suficiente, esaki lo por ta den bo desbentaha ora problema surgi.

Tip 4: (Garantia)

Nos ta conoce 4 tipo di garantia. “fabrieksgarantie”, “winkelgarantie’, Wettelijke garantie y Bijgekochte garantie”. Garantia di fabrica hopi biaha tin un periodo di 1 pa 2 aña. Esaki ta e garantia cu fabrica ta pone riba e producto. Segun ley si e fabrica no ta situa na Aruba, e compania cu ta importa e product ta esun cu ta keda responsabel pa e producto. Garantia di tienda ta e garantia cu e tienda/compania mes ta pone riba e producto. Garantia legal ta garantia cu ta regla pa ley. Garantia legal kiermen cu e consumido tin e derecho riba un producto bon. Si e consumido a uza e producto na un manera normal y toch e producto ta mustra un defecto cu no ta causa dor di e mal uza di e consumido, e compania mester drecha of cambia e producto. Por ultimo nos ta haya e garantia adicional, esaki ta un garantia cu hopi biaha e consumido mester paga pe. E garantia aki no ta necesario ora ta trata di producto defecto. Unico ora cu por conseha pa cumpra garantia adiconal ta si e garantia ta brinda e consumido mas derecho cu e garantia legal.

Den bo proceso di selecciona un auto nobo pa cumpra, semper tene cuenta cu garantia. Nos por conseha bo persona pa purba di uza e garantia di fabrica como guia. E motibo pa cu esaki ta pasobra companianan hopi biaha ta cumpli cu e garantia di fabrica mas lihe cu garantia legal of garantia di tienda. Sinembargo, mas balor y calidad e auto of piesa tin, mas largo esaki mester funcciona sin problema segun ley. Si bo ta di opinion cu bo auto of piesa no ta conforma e acuerdo, tuma contacto cu e a garashi di auto y trata hunto di yega na un solucion. Si tin cualkier duda, pregunta of mester di intermediacion of conseho legal, por fabor tuma contacto cu nos departamento pa asistencia.

Na e articulo aki bo no por adkiri derecho, pero pa mas informacion riba leynan cu ta trata derecho di consumido, haci un keho of registra un abuso contra consumido yama of pasa personalmente na Dienst Huur- en Consumentenzaken na Wayaca 33, tel: 5829914, bishita nos website: www.dhc.aw, “like” nos of conta un anecdota riba facebook, sigui nos via twitter of e-mail nos na info@dhc.aw.

Dienst Huur- en Consumentenzaken (DHC) kier alerta tur consumido riba un movecion cu a ser observa na Aruba.

Ta lo siguiente: Tin un compania cu ta brinda servicio den e area consultorio y servicio financiero cu posiblemente ta mal informa consumidonan tocante e obhetivo di e compania, actuando como specialista den seguro of profesional den ley tanten cu nan no ta autorisa pa duna servicio ariba e tereno aki. E compania aki lo ta acerca victimanan di un accidente di un vehiculo di motor den momento cu esaki ta confundi, agita of posibelmente herida y ta trata di obtene informacion priva di e victima, cu e  meta pa asigura representacion y cobra compensashon pa e servicio aki na e compania di seguro.

Dienst Huur- en Consumentenzaken ta pidi consumidonan pa ta extra atento ora ta divulga informacionan priva. Ta consehabel pa solamente duna informacion priva necesario directamente na un representante di e compania di seguro, of verifica cu e un tercera compania ta trahando pa e compania di seguro. No firma ningun documento sin lesa esaki prome y demanda un copia di tur documento cu bo firma despues di ta di acuerdo cu e contenido.

Si tin cualkier duda of si kier raporta un keho, por fabor tuma contacto cu nos departamento.

Dia mundial di derecho di consumido ta un oportunidad pa trece dilanti topico nan di interes pa e consumido.  E fecha aki a keda inspira pa e president Mericano J.F. Kennedy, kende a duna un discurso riba 15 di maart 1962 na e congreso di su pais, den cual e presidente formalmente ta toca e asunto di derecho di consumido.

E fecha aki internacionalmente ta haya atencion specialmente di e organisacion “Consumer International”. Cada aña e organisacion internacional aki ta scoge un tema y e tema pa 2019 ta: “Productonan ‘smart’ cu ta confiabel”. Lesa mas akinan: DiaMundialdiDerechodiConsumido2019.pdf